Cunferèntzia Progetu SA BATALLA DE MACUMERE- PÌNDULAS DE ISTÒRIA, in Biblioteca Comunale de Macumere, chenàbura 29 de abrile 2016 a sas oras 6 de sero.

Chenàbura 29 de abrile 2016, a sas oras 6 de sero in sa Biblioteca Comunale de Macumere, apo a fàghere una cunferèntzia “Sa batalla de Macumere- Pìndulas de Istòria” ; at a èssere s’ocasione pro contare custu progetu ammaniadu dae mene cun s’agiudu mannu de s’Amministratzione Comunale de Macumere- Assessoradu a sa Cultura e s’Istrutzione Pùblica, chi l’at crèfidu pònnere in intre de sas manifestatziones propedeùticas a sa de XV Mustra de su Libru in Sardigna chi s’at a fàghere in Macumere dae su 19 a su 22 de maju 2016.

Su progetu , sighinde un'àndala incumentzada in su 2013 cun sa publicatzione de unu libreddu, previdit una serie de addòvios cun sos iscolanos de sas iscolas primàrias de Macumere, a manera particulare sas classes 4a e 5a, ma a sa fine, at aderidu puru carchi classe de sas 3a.

Est agredèssidu meda a sos pitzinnos e a sas pitzinnas, su contu de “Sa Batalla de Macumere” contadu a manera dereta dae Linardu de Alagon- Cubeddu, s’ùrtimu marchesu de Aristanis, chi at contadu sa gerèntzias sua dae sos giughes de su Regnu d’Arbarèe, su coju non fatu intre sa fìgia sua Lianora e Dalmàtziu, su fìgiu malu de su vitzerè Nigola de Carroz.

Est agrèssidu a sos pitzinnos e a sas pitzinnas, bìdere sos giassos de sa batalla: Campu Castigadu, S’Erbagusa, Bonudrau, su Nuraghe sa Corte, Sa Rocchita o sa Presone ‘Etza, S’Adde, Meriaga etz.

Chenàbura in s’addòviu pro sos mannos amos a bìdere mègius personagios, giassos e fatos de custa batalla, pro sa cale, a dolu mannu, in Macumere, non est istada posta mai, mancu una pedra manna pro l’ammentare. Pro como chèrgio torrare gràtzias mannas a s’Amministratzione Comunale- Assessoradu a sa Cultura chi m’ant dadu sa possibilitade de fàghere custu progetu, a sa Biblioteca Comunale pro s’ospitalitade, a sos dirigentes, a sas mastras e a sas iscolanos e a sas iscolas chi m’ant intesu in sos addòvios cun passèntzia e disponibilidade manna. Torro gràtzias mannas a Giùliu Ledda chi at fatu sas mazines de sa batalla, de Nigola e Dalmatziu de Carroz e de Liànora de Alagon e a Anna Gemino de sa Biblioteca Comunale chi at progetadu sa gràfica de su libreddu de su 2013. Bos aiseto chenàbura….e chie non cheret…crepet!